Artiola Toska: Kënget e mia sjellin gjithmonë risi për publikun

Artiola Toska

Këngëtarja e mirënjohur Artiola Toska pas publikimit të albumit të saj të ri flet për radio SOT. Intervista e plotë e artistes dhe mendimet e saj për muzikën popullore shqiptare botohet ekskluzivisht edhe për gazetën.

-Kënga juaj “Vjehrrën mbaje krejt si nënë” është një këngë që është hedhur në tregun muzikor për festat e fundvitit. Kjo këngë ka qenë një gjetje, bashkëpunim me dy artistë të njohur si Edi Balili dhe Jorgo Papingji. Publiku vazhdon të tregojë të njëjtin interes.
Në fakt kjo është e gjetur si këngë, dihej që do të godiste në publik.Marrëdhënia vjerrë nuse është gjithmonë aktuale. Që në fillim unë kam kërkuar që të stimuloja dhe të shprehja një pozitë të barabartë lidhur me problemet e marrëdhënieve të vjerrës, nuses, apo dhëndërrit. Megjithëse u përpoqa, më duket se u bëra armike me nuset.
-Në albumet e kaluara Artiola Toska ka sjellë shumë këngë të Shqipërisë së mesme të përpunuara. Kohët e fundit ju keni sjellë një krijimtari të re në muzikën popullore. Nuk po sillni këngë të përpunuara si kanë bërë gjithmonë këngëtarët.
Albumi që ka dalë tani është albumi i gjashtë që kam hedhur në treg. Të gjashtë këta albume kanë patur 80 % krijimtari të re. Jam përpjekur gjithmonë të bëjë krijimtari të re, pastaj varet se kush nga këto këngë godet në publik.
-Në krahasim më gjashtë albumet e tjerë a është ky më i godituri nga këta?
Albumet janë të bukur për kohën që dalin në treg. Kur doli albumi i parë u pëlqye shumë për atë kohë. Me kalimin e kohës muzika bëhet më e bukur dhe ndryshojnë edhe shijet në publik, megjithatë albumi i fundit ka materiale të realizuara.
-Keni nxjerrë gjashtë albume në treg, mendoni se keni thyer një rekord?
Besoj se mund të jem një nga këngëtaret e vetme që kam gjashtë albume dhe jam e kënaqur për këtë sepse unë nuk bëj albume shpesh, por një herë në dy vjet.
-Kënga “Një filxhan u bë sebep” është një nga këngët e albumit tuaj të ri nga e cila ka marrë dhe emrin ky album. Pse keni zgjedhur këtë titull?
Mu duk si titull shumë interesant prandaj bëra këtë zgjedhje. Kjo këngë ka një fabul shumë interesante.
-Tekstet e këngëve tuaja janë të reja dhe Jorgo Papingji është bashkëpunëtori juaj fiks. Nuk bëni ndryshime në këtë pikë?
Nuk bëj ndryshime këtu sepse tashmë kuptohemi shumë mirë. Mund të kërkoj diçka nga Jorgo dhe mund të më plotësohet ajo kërkesë pa frikë. Bashkëpunimi ka edhe një histori të vjetër. Kur kam qenë në moshën dhjetë vjeçare profesor Jorgo ka qenë drejtor i Pallatit të Pionierit në lagjen katër dhe ka përzgjedhur talente aty. Ai ka qenë profesori im i parë.
-Me kë keni bashkëpunuar për realizimin e këngëve të reja në këtë album?
Kënga “Një filxhan u bë sebep” është një orkestrim i Shpëtim Saraçit, kënga “Vjerrën mbaje krejt si nënë” është e Edi Balilit dhe albumi ka edhe tre këngë të Shqipërisë së mesme që janë përpunuar edhe në orkestrim por edhe në mënyrën e të kënduarit.
-Nga të gjitha këngët që përfshinë ky album kush është shndërruar në hit përveç “Një filxhan u bë sebep”?
Nga opinionet që kam marrë nga adhuruesi i muzikës popullore është e pëlqyer kënga “Ruju goc” me kompozim të Fatmir Lelës dhe me tekst të Jorgo Papingjit. Këto kanë qenë këngë shumë të bukura, që mund të godisnin të gjitha por natyrisht që në këtë album “Një filxhan u bë sebep” janë ato më të goditurat. Në një album spikatin ato më të bukurat.
-Pse vendosët që të bëni një këngë hit dhe më pas të bëni një album?
Në Shqipëri nuk realizohet gjithçka kur dhe ku e do. Albumi im duhet të përfundonte që në nëntor por pastaj duhej u shty afati i lançimit të tij për disa muaj dhe m’u desh që të nxirrja patjetër një hit në fund të dhjetorit. Kam menduar që të jem sa më pranë publikut në të ardhmen duke nxjerrë në treg dy apo më shumë hite në vit. Më pas mund të bëj edhe një album por nuk i dihet.
-Është më e lehtë që të nxirrni një këngë hit sesa të bëni një album?
Po është shumë e vërtetë pasi realizimi i një albumi ka lodhje psikologjike. E quaj lodhje psikologjike sepse duhet të gjesh tekstet, muzikën, më pas të bësh orkestrimin dhe kur të jesh gati për të regjistruar është e zënë studio apo jo pas një muaji, pas dy muajsh dhe kështu pas dy vjetësh del albumi.
-Keni realizuar edhe mjaft bashkëpunime me këngëtarë të tjerë një ndër të cilët është Bujar Qamili. Pse nuk keni bashkëpunim në albumin tuaj por ai gjendet në atë të bashkëpunëtorit tuaj?
-Në albumin e kaluar kam patur në album Bujar Qamilin, duet me të. Ky album ka patur shumë hite të bukura dhe por unë në atë periudhë nuk munda të bëja vidioklipe dhe kjo është një plus i madh për këngën.
-Albumi juaj i fundit ka çdo këngë një videoklip. Ka ndodhur kjo në albumet e parë?
Po. Albumi para këtyre tre që kam nxjerrë ka patur videoklipe. Kaseta video që u realizua nga ky album ka qenë e dyta pas asaj të këngëtares Ermira Babaliu.
-Kjo verë ka sjell një fluks të madh të këngëtarëve. E ndieni konkurencën?
Aspak. Për mendimin tim çdo këngëtarë ka publikun e vet dhe unë jam natyrë tjetër në interpretimin e këngës popullore qytetare tiranase.
-Në verë ka shumë albume që dalin në treg. Nga se varet kjo gjë?
Nga shtëpitë diskografike dhe nga fakti se në verë vijnë emigrantët dhe tashmë kryesore është që të shitet një album.
-Interesoheni në dalje të albumit për shitjen e tij?
Apsolutisht që jo. Nuk interesohem sepse e di që do të shitet dhe kjo vjen nga një siguri që kam fituar unë gjatë eksperiencës sime. I jap publikut atë që dëshiron.
-Albumet tuaj të kaluar janë shoqëruar me një koncert recital. A do të ndodhi dhe me këtë album?
Nuk mund të jap fjalën por shpresoj që të realizoj një koncert recital në nëntor.
-Keni patur koncerte dhe mund të na tregoni diçka lidhur me ta?
Në fakt unë kam katër vjet që kam shumë lëvizje dhe aktivitete të cilat janë bërë në Greqi, Itali, Gjermani, Angli etj. Ndihem mirë kur këndoj për bashkëatdhetarët në emigracion. Në verë këngëtarët e muzikës popullore këndojnë edhe në dasma.
-E ndien veten me fat që je një këngëtare e muzikës popullore dhe jo e muzikës klasike apo e lehtë?
Unë kam patur mundësinë që të këndojë muzikën e lehtë por nuk dua që të ngatërrohem me atë zhanër.
-Këngët e albumeve të kaluara pëlqehen akoma. Si ndiheni lidhur me këtë?
Kjo është gjë e mirë sepse unë e kam thënë edhe më parë se është arritje e madhe për mua që një kompozim godet.
-Ç’është skena dhe publiku për ju?
Skena është gjithçka për mua. Ajo është e shenjtë.
-Kënga “Ruju goce” është e pëlqyer për publikun. Pse?
Është një këngë e pëlqyer sepse ka një subjekt shumë të bukur.
-Përse nuk keni realizuar asnjë këngë nga jugu dhe veriu?
Nuk kam realizuar asnjë në fakt në album, por me këngët e veriut ndihem mirë. Nga jugu kam kënduar së fundi një këngë.
-Artiola Toska në bashkëpunimin me Dalaran, këngëtarin grek?
Nuk e prisja këtë bashkëpunim. Kishte një vit e gjysmë që më ishte bërë si ftes por nuk e kisha marrë me seriozitet. Më pas u bë ky bashkëpunim. Pas kësaj unë kam bërë edhe këngë me tekst në greqisht, këngën “Nëna” dhe një baladë për emigrantët. Në koncertin e Dalaras kishte një këngë shqipe “25 gërsheta” dhe në atë koncert unë duhet që ta këndoja në shqip këtë këngë. Ishte diçka e mrekullueshme kjo eksperiencë sepse u gjenda në një skenë me një publik prej 5000 vetash. Ai ishte një koncert i Dalarës dhe këngëtares portugeze Dulçe Ponte. Është i vetmi rast kur mu drodhën këngët. U prita shumë mirë atje.
-Si është ndjerë me këngët shqipe Dalara?
Ai është gjendur shumë mirë në këto këngë megjithëse i ka përshtatur me natyrën e vet. I ka arritur shumë mirë, aq sa nuk të besohet që është grek. Këndimi i këtyre këngëve në gjuhën greke ishte mbresëlënëse.
-Do të keni bashkëpunime të tjera me këngëtarë të huaj Artiola Toska?
Nëse do të kem ftesa ndoshta po.
-Artiola ka interpretuar këngë shumë të vështira të Shqipërisë së mesme. Pse?
Më pëlqen t’i këndoj sepse jam tiranase dhe do të doja që të këndoja vetëm këngët profesionale.
-Cili ka qenë udhëtimi më i largët që keni bërë?
Përveç Amerikës edhe Kanadasë kam shkuar edhe në Meksikë. Kam shkuar atje më një ansambël popullor.
-Cila është dita më me fat për ju?
Nuk e di, ndoshta e premtja.
-Sa kohë të lirë ka Artjola?
Gjatë javës jam e lirë. Fundjava është e zënë.