Gjon Keka: A është vërtetë Kosova shtet laik?

A është vërtetë Kosova shtet laik?

Nga Gjon Keka

Gjersa të mos shfaqet një pasardhës i vërtetë me tiparet e Gjergj Kastriotit, i cili do t’i marrë gjërat në duar siç duhet, Kosova do të vazhdojë të udhëhiqet nga renegatë dhe mbetje që, ndërsa hanë iftare islamike, synojnë ta shndërrojnë atë në një "komb kosovar" pa të kaluar dhe pa të ardhme.

Duke qenë se Kosova, sipas Kushtetutës, është shtet laik, asnjë pushtetar nuk duhet të veprojë në frymën e një ideologjie fetare apo të favorizojë një të tillë, aq më tepër një ideologji fetare të trashëguar nga një pushtues si Perandoria Osmane, e cila, me shpatë në dorë, shkaktoi vuajtje, persekutime dhe përndjekje të popullit dardano-arbëror.

Ata që pretendojnë se ideologjia islamike u pranua pa dhunë, le të mësojnë nga historia dhe dëshmitë e saj tronditëse. Po ashtu, le të kujtojnë migrimin masiv të arbërorëve nga trojet tona pas vdekjes së Gjergj Kastriotit, të cilët u vendosën në Itali dhe sot njihen si arbëreshë. Për të ruajtur besimin, identitetin dhe qenien e tyre europiane, ata u detyruan të migronin, njësoj si arbanasit e Zarës, të cilët ruajtën me përkushtim traditat dardano-arbërore.

Sot, Kosova i ngjan më shumë një vendi të udhëhequr nga "sulltanë" të vegjël, satelitë të politikës neo-otomane, të cilët synojnë ta shndërrojnë atë në një shtet islamik. Një njollë e tillë do ta pengonte integrimin e saj në familjen e saj natyrore europiane.

Kur shoh se si ideologjia islamike ka depërtuar në çdo aspekt të shtetit të Kosovës dhe se udhëheqësit e saj janë vetëm mbetje otomane që nuk punojnë për një Kosovë dardane dhe europiane, por për një Kosovë me imazh islamik, më kap tmerri. Kjo është një turp i madh për imazhin e vendit tonë. Shndërrimi i Kosovës në një shtet të tillë do të ishte vetëvrasje historike, kombëtare dhe shtetërore – një mallkim i madh për të ardhmen e saj. Veshja me petkun e ideologjisë islamike është një vetëvrasje kombëtare dhe shtetërore.

Për t’i vënë vulën gjithë kësaj: në një shtet laik si Kosova, asnjë udhëheqës apo pushtetar nuk duhet të marrë pjesë në ndonjë manifestim ideologjik fetar – qoftë katolik, islamik apo i çfarëdo tjetër ideologjie fetare. Një udhëheqës i vërtetë, vizionar dhe me identitet duhet ta respektojë Kushtetutën dhe të qëndrojë larg ideologjive fetare dhe preferencave të tyre.