Refik Havolli: Frymë e çastit

Refik Havolli

FRYMË E ÇASTIT

Shpejt ditët ikin, pa gjurmë, pa zë,

Dje ishte ëndërr, sot është ç'ka në të.

Muajt fluturojnë, vitet harrojnë,

Në pasqyrë rrudhat historitë tregojnë.

Prindërit largohen, kujtimet veniten,

Rrugët e jetës shpesh dhimbje na fikin.

Por ja ku jemi, në këtë moment të artë,

Me dashuri të ndezur, një zemër të zjarrtë.

Ndalu, shiko, dhe thellë ndjej,

Një ditë e humbur s'vjen më në rrugën që tej.

Çdo çast është një mundësi për të krijuar,

Të duam, të falim, një botë më të bukur për ta ndërtuar.

Ngjyrosim ditët me buzëqeshje e ngrohtësi,

Të dhurojmë dashuri, të jetojmë me fisnikëri.

Koha s’pret, momenti fluturon,

Kujtimet janë ajo që zemrën na emocionon.

Kosova jonë, dheu që ne duam,

Le të jetë gjithmonë vendi ku ndërtojmë e ruajmë.

Trashëgojmë vlera, një thesar për çdo brez,

Të çmojmë momentin, ta shijojmë pa stres.

Sot është dita, tani është çasti,

Të jetojmë jetën me pasion e me rrasti.

Me zemër plot falenderim,

Për gjithçka që kemi, për çdo frymëzim.

_________

Refik Havolli është një ekonomist dhe menaxher i njohur, i lindur më 10 qershor 1967 në fshatin Llapashticë të Podujevës. Fillimisht, ai kreu shkollën fillore në vendlindje, shkollën e mesme në Podujevë dhe pastaj vazhdoi studimet e tij në Universitetin e Prishtinës, duke marrë sukses në nivelin universitar dhe pasuniversitar.

Havolli vazhdoi karrierën e tij akademike duke përfunduar studimet e doktoraturës në Universitetin Ndërkombëtar të Strugës, ku mori titullin Doktor i Shkencave Ekonomike. Nëpërmjet pjesëmarrjes së tij aktive në seminare dhe konferenca, ai ka ndarë njohuritë dhe përvojën e tij në fushën e ekonomisë me audienca vendore dhe ndërkombëtare. Ka publikuar me dhjetra punime shkencore të rëvista ndërkombëtare, gjithashtu ka publikuar shkrime në portale vendore dhe ndërkombëtare, kryesisht nga fusha e ekonomisë dhe biznesit.

Ai gjithashtu është një autor i njohur i poezisë, duke publikuar veprat e tij në forma librash si dhe ka kontribuar në disa monografi vendore dhe ndërkombëtare me krijime të tij. Në vitin 1992, Havolli themeloi kompaninë e tij të suksesshme "Passable", ku ka shfaqur aftësi të shquara menaxheriale dhe udhëheqëse që nga fillimi.

Në fushën e arsimit të lartë, Havolli ishte një ligjërues i rregullt në Kolegjin e Menaxhimit Ndërkombëtar "Globus" në Prishtinë që nga viti 2019-2022. Përveç kësaj, prej muajit shtator të vitit 2020, ai është gjithashtu Anëtar i Bordit të Drejtorëve dhe Kryetar i Komitetit të Auditimit dhe Menaxhimit të Riskut në IMFJB "Pro Finance Home" Sh.a në Prishtinë, tregues i rolit të tij të rëndësishëm në fushën e financave dhe menaxhimit në nivel korporativ.

Me shkrime ka filluar të merret që nga shkolla fillore. Sa ishte nxënës, botoj shumë poezi në revistat e kohës. Gjatë luftës shumë dorëshkrime iu dogjën. Disa nga ato që i shpëtuan, ndodhen në librin e tij ”Ëndërr buzë lumi” (Prishtinë 2015). Sidomos sa ishte nxënës i shkollës së mesme poezitë i dërgonte në revistat Pionier dhe në Rilindje në shtojcën “Rilindja për fëmijë”.

Në vitin 2016 në Bukuresht të Rumanisë në Revistën e Diasporës Shqiptare “Albanezul” (“Shqiptari” ) një numër i saj i është kushtuar poezive të tij dhe janë në gjuhën shqipe. Në vitin 2016 në antologjinë letrare-poetike “Familja e fjalëve” gjithashtu janë botuar disa poezi në gjuhen Rumune. Zjarri i Jetës / Focul vie?ii” (Antologjia poetike-Antologie poeticã), ishte prezent me disa poezi. Në vitin 2018 në Bukuresht të Rumanisë në Antologjinë e poezisë shqipe të botuar në rumanisht, gjithashtu janë 8 poezi nga krijimtaria e tij letrare.