Kastriot Dervishi: Desanti

Desanti

Nga Kastriot Dervishi

Seit Bylykbashi (1925-1951), nga Piluri i Korçës, në vitin 1945 mundi të largohej nga paraburgimi e të arratisej në Greqi së bashku me një shok. Në mars-tetor1949 qëndroi në kampin e Santa Forës në Itali. Ai bëri pjesë në grupin e drejtuar nga Mustafa Dushari, i cili së bashku me Shahin Qosjen e Shefqet Braçellarin, zbarkuan në Divjakë më 15.11.1949. Seiti pohonte se ndonjë detyrë nuk iu dha, porse porosia ishte se me të mbërritur kjo do u komunikohej me radio. Pas dy ditësh nga zbarkimi grupi mbërriti në malin e Dusharit në Opar. Mustafai mori radion, por ajo nuk punonte. Atëherë vendosi lidhje me familjen e vet. Të fshehur në mal kanë qëndruar deri më 15.4.1950. gjatë gjithë kohës janë furnizuar me bukë nga familja e Mustafait, Sula, Abazi e Asimi. Më 15.4.1950 u orvatën të zbresin në fshat, por u gjetën të rrethuar. Mustafa Dushari u vra në përpjekje, ndërsa të tjerët Seit Bylykbashi, Shahin Tosun Qosja u kapën. Fati i Shefqet Braçellarit (Lozhani) mbetet i paqartë. Seiti u dënua me vdekje me vendimin nr.5, datë 22.10.1951 të Kolegjit Penal të Gjykatës së Lartë dhe u ekzekutua së bashku me Vangjel Dhimën dhe Isuf Canin.