Mihal Gjergji: E shtrenjta, Labëria ime

Mihal Gjergji

E SHTRENJTA, LABËRIA IME

(Valltarit A. Milori)

Një dorë mbi sup, te Këndrevica

Me tjetrën zgjatesh, mbledh rrufetë

Në ç'ninull të përkund Shefikua

Se ti je nip te Bilbilenjtë?

Ngarkuar dhimbjen e Atdheut

Si fermele, lidhur rreth kokës

Me ç'simfoni i flet Anteut

Që rri mbërthyer fort pas tokës?

Dhe zgjatet vallja mbi humnera

(Remziu derdh një det rrebeshi!)

Xhufkat e kuqe i puth era

Me qiejt puthet Kurveleshi

Të kishim këngë, të rritnim djepe

Po kënga hesht, nuk di ç'ka ngjarë

Gjykon-gjykimin farë e keqe

E kemi rrapin dëshmitar...!

Këmbët mbi zjarr, gjoksin mbi topa

Epizmin pi dhe vjell mallkime

Të bënë gërmadhë, të ndanë në copa

E shtrenjta, Labëria ime!

Tiranë, Shtator 2017