Idriz Zeqiraj: Letër përkujtese për miqtë e mi të LDK-së

Letër përkujtese për miqtë e mi të LDK-së

PENDESA E VONUAR - ËSHTË E DHIMBSHME!

Nga Idriz Zeqiraj

Bashkërrugëtojmë përtej tri dekadash, në LDK-në e Ibrahim Rugovës. E di që e keni dashur dhe e doni Rugovën, në gjallje dhe amshim. Për Rugovën dhe Kosovën keni qenë, përherë, të gatshëm të punoni dhe të kontribuoni, si veprimtarë dhe ushtarë, që keni bërë paqen dhe luftën, me financa dhe pushkë.

Vitin e shkuar (2023), Shoqata "Sali Çekaj" në Gjermani dhe Zvicër, së bashku me disa veprimtarët nga LDK-ja, realizuan disa vepra: bustin e heroit Adem Ukëhaxhaj në Deçan; bustin e veprimtarit kombëtar arbresh, Kruno Kërstiç, në Zare të Kroacisë; shtatoren e heroit Rrustem Bruçi, në Pejë; shtatoren e heroit Smajl Hajdaraj, në Pejë; shtëpi e ndërtuar në Mitrovicë, për ushtarin në nevojë të Kosharës dhe disa aksione të tjera sekondare, që kapin shumën numerike prej 200 mijë eurove.

I mësuar për t`i parë emrat e miqve të mi, në aksionet e ndryshme ndër vite e dekada, tani po befasohem me mungesën tuaj të përsëritur në listat kontribuese. Aq më ndjeshëm, kur të gjitha aksionet ndërlidhën fort me Presidentin Rugova, me formacionin e Tij ushtarak dhe luftarak- FARK-.

Së fundi, nga njerëz vullnetmirë, u nismua "Aksioni për mbledhjen e mjeteve financiare, për realizimin e Filmit artistik Dokumentar - Ibrahim Rugova - Rilindasi i fundit -, kushtuar jetës dhe veprës të themeltarit të shtetit të Kosovës, Presidentit historik, Dr. Ibrahim Rugovës, nga producenti Gani Mehmetaj; realizimi nga Shtëpia Filmike Dardania Press. Kërkesës fisnike të producentit Gani Mehmetaj dhe të Këshillit Organizativ, për realizimin e Dokumentarit filmik të cituar, Ministria e Kulturës, lehtësisht dhe shpërfillshëm, e refuzoi, e heshti, pa dhënë ndonjë arsye, qoftë edhe dert-bërëse, të nismëtarëve, miq të pa hile të Presidentit Rugova!

Me besimin e madh se Presidenti ka lënë miq të bollshëm, për përjetësimin në art të veprës madhore jetësore të Tij, ideatorët e projektit filluan aksionin e mbledhjes të mjeteve të nevojshme financiare. Por, heshtja, hezitimi i shumë miqve të mi të LDK-së, të dëshmuar ndër vite, si veprimtarë dhe donatorë të pakursyer, zhgënjen skajshëm!

Kjo heshtje nuk mund të justifikohet, me paragjykimet për cilindo që angazhohet për realizimin e projektit. Ka forma dhe mundësi të bollshme, për të kontribuar. Mjafton një kërkesë për autorizim, me garanci për transparencë emërore dhe shumën vullnetare të dhënë, duke i bërë publike në -Facebook-. Në këtë formë janë realizuar qindra aksione financiare dhe asnjëherë nuk ka ndodhur kurrëfarë abuzimi.

Është kjo një thirrje e çiltër dhe shumë miqësore për, të gjithë miqtë e mi të LDK-së, për miqtë e devotshëm të Presidentit Rugova. Po kursehem në emra, sepse miqtë e mi, njëherësh, edhe miqtë e Dr. Rugovës, janë të shumtë, numerikë, të cilët, pa ndonjë sforcim të veçantë, janë në gjendje ta realizojnë projektin artistik dhe diç më shumë, për figurën emblematike të Presidentit Rugova.

Çdo nsimë fisnike, e filluar me qëllmin e mirë, mund të vonojë, por, gjithësesi, do të pëmbyllet me sukses. Personalisht krenohem që isha pjesë e Këshillit Organizativ, i një projekti madhor të mëparshëm, për ngritjen e Kullës, Shtatorës, Amfiteatrit, respektivisht, Kompleksin Memorial, "Dr. Ibrahim Rugova", i ngritur në fshatin e origjinës të Presidentit Rugova, në Malaj të Rugovës, me koston prej 150 mijë euro. Fillimisht, kishte skepticizëm për ta realizuar. Dhe, u hesht në pritje, për 5 (pesë) vite radhazi.

Dhe, ishte, pikërisht, ky ekip nismëtar i tanishëm, bollshëm i dëshmuar në qindra aksione të sukseshme, i cili e realizoi fisnikërisht projektin. Dhe, ekipi në fjalë, aktivizoi projektin, me gurë-themelin e hedhur nga akademik Mark Krasniqi, që ri-aktivizoi dhe realizoi suksesshëm aksionin financiar, për Kompleksin Memorial "Dr. Ibrahim Rugova", me trinomin e dëshmuar: Shoqatat simotra "Sali Çekaj", në Gjermani e Zvicër; Shoqata "Rugova", me seli në Amerikë, si dhe veprimtarë individual dhe gruporë të LDK-së.

Kjo do të ndodhë edhe me realizimin Dokumentar fimik artistik, kushtuar Rilindasit të fundit, Heroit Kombëtar, babait të Pavarësisë të Kosovës, Presidentit Rugova, i cili për rolin e Tij historik, nuk ka ndërmjetës në historinë kombëtare-shqiptare, pas kryeheroit mesjetar, Gjergj Kastriotit.

Latinët e lashtë kanë një urtësi, që përjetëson përkujtesën e dëshmuar me shkrim: "Verba volant, skripta manent", e shqipëruar -Fjala fluturon, e shkruara mbetet-. Pra. kontributi financiar i dhënë, për rastin në fjalë, mbetet -dëshmi e shkruar- përjetësisht. Pendesa e heshtjes të miqve të Presidentit Rugova, do të mbetet peng dhe barrë e rëndë në ndergjegjen e tyre.

Informacioni për donatorët:

Bartëse të mjeteve financiare:

1) Shoqata "Sali Çekaj"

Konto Nr. Sparkasse, Pfaffenhofen - Gjermani

(IBAN: DEO7 7215 1650 0009 3335 01)

Osman Ferizi, kryetar i Këshillit Organizativ për Gjermani dhe jashtë saj, tel. 0049-151-50982506

2) Konto Nr. në Kosovë

Reiffeisen bank: 1501114292807

Gani Mehmetaj, producent i filmit, tel. 00383-49-905 477

Kostoja e filmit 170.000 Euro

(Bizneset lirohen nga tatimi në Kosovë)

Me shpresë e besim të mirëkuptimit, ju përshëndes çiltërisht të gjithë ju - miqtë e mi të shumëdashur të LDK-së tonë!

Juaji - me dlirësi ndjenjash - Idriz Zeqiraj