Blerim Rrecaj: Loja me aeroplanë prej letre

Blerim Rrecaj

LOJA ME AEROPLANË PREJ LETRE

Ishim duke ndejtë në dhomë

Të afërm e familjarë

Dikush kërkoi një letër

Dhe ndërtoi një aeroplan

E hodhi në ajër

Përcollëm fluturimin e tij

Ateroi fluturakja e bardhë

Në një pistë dhome diku mbi tepih

Na u kujtua kjo lojë e harruar

Kërkuam e na erdhën letra tjera

Secili ndërtuam fluturaken tonë

Vazhdoi kjo lojë u nxeh atmosfera

Njëra si bartëse udhëtarësh shkonte drejt

Tjetra vërtitej rreth e qark

Një tjetër binte pingul duke bërë zhurmë

Sikur të ishte aeroplan luftarak

U mbush dhoma fluturime të llojllojshme

Humbëm duke vështruar ato

Ne pilotët nisnim aeroplanët

Pastaj ato fluturonin pa pilot

Binin aeroplanët që hidhnim

Në ballë, në flokë, nën e mbi kokë

Rrëzonin një shishe plastike uji rugove a tepelene

A kryshyteshin diku në një gotë

Vazhdojnë të mos ndalen fluturimet e bardha

Duke goditur në gjygym, radio, televizor

Derë, dritare, ndërprerës, shtekerë

E duke dalur edhe në korridor

Dikush u tegua i papërmbajtshëm

Dhe me vrull doli në ballkon

E hodhi fluturaken që i uruam rrugë të mbarë

Dhe për sonte kaq dhe kjo lojë mbaroi