Engjëll Koliqi: Letër e hapur Kryeministrit Hoti

Letër e hapur Kryeministrit të Republikës së Kosovës Avdullah Hotit, lidhur me “dialogun” me Serbinë:

JO DIALOG POR MARRËVESHJE PËR PAJTIM DHE FQINJËSI TË MIRË, E KUSHTËZUAR NGA KOSOVA

Shkruan: Engjëll KOLIQI

I dashur dhe shumë i nderuar Kryeministri ynë Avdullah Hoti! Unë që po të drejtohem me këtë letër të hapur jam një intelektual i partisë tënde – LDK-së, një që të do dhe të respekton shumë. Në rrethanat, në të cilat ndodhemi ne dhe vendi ynë, jam i shtrënguar të të drejtohem me këtë letër të hapur, lidhur me marrëveshjen për pajtim dhe për fqinjësi të mirë me Serbinë, që nuk po e kuptoj pse ju po e quani dialog?!

Kryeministër i dashur, publikisht të kërkoj që të mos jeni inferior në takimet me palën serbe, sidomos me kriminelin e dëshmuar, Aleksandar Vuçiqin. Pse ai të na e diktojë ne rrjedhjen e bisedimieve, edhe të na kushtëzojë. Kushtëzimi duhet të jetë nga ana jonë o Zotëri Kryeministër.

Në emrin tim, edhe në emër të shumicës dërmuese të popullit dardan të kërkoj që ta kushtëzosh krijesën famkeqe të quajtur Serbi dhe udhëheqësit e saj, për këto bisedime, duke iu thënë troç:

Nuk ulem në tavolinë bisedimesh me ju, pa i plotësuar ju këto kushte:

·       Kurrë jo pa paguar dëmshpërblimin e luftës dhe të pushtimit mbi njëshekullor.

·       Paguani kontributet e punëtorëve kosovarë dhe pensionet e tyre, për sa kanë kontribuuar për Serbinë, gjatë pushtimit.

·       Kërkoni falje publike për krimet e bëra në Kosovë.

·       Zubardheni vrasjen e qytetarit të Kosovës Oliver Ivanoviq.

·       Ndalojeni fushatën e egër dhe absurde për mosnjohje të shtetit të Kosovës.

·       Njiheni pavarësinë e Kosovës, që të ju njohim edhe ne juve, para se të ulemi në bisedime për pajtim dhe fqinjësi të mirë.

·       Hiqni dorë njëherë e përgjithmonë nga politika tragjikomike e Serbisë në Kosovë.

·       Harrojeni “Republika Srpska” në Kosovë.

·       Thuani po ulemi për pajtim dhe marrëveshje për fqinjësi të mirë e jo për dialog.

·       Pajtohemi kështu pa kushte e pa paragjykime, e harrojmë të kaluarën dhe e ndërtojmë të ardhmen, si fqinjë të mirë.

Dardani, dhjetor 2020