Albert Habazaj: Dëborë në Tërbaç

DËBORË NË TËRBAÇ

Këngë nga Albert HABAZAJ

Në Tërbaçin ton’ të dashur ra dëborë

Në fshatin me Çikën matur, vë kurorë.

Vë kuror’ dëbor’ e bardhë mbi Tërbaç,

Tërbaçin që asnjë hasmi s’dha haraç.

Dhe në dimër ësht’ i bukur fshati ynë,

Se s’luftoi për t’u dukur, i puth synë

I puth syrin e drenushës, sy fisnik,

I puth ballin lar’ me diell, shpirt lirik.

Prap’ na do Tërbaçi ynë, fshat bujar,

Andej kur e kthejmë synë, ësht’ krenar.

Kur harrojmë, heq në zemër, na qorton,

Me mallin e ngrohtë të zemrës na afron.

Me dashuri djali për vendlindjen,

Albert Habazaj, e diel, 15. 01. 2017, ora 13.03’

DHJETË SHQIPONJAT E TËRBAÇIT

Nga Albert HABAZAJ

Vallja - kurorë dafine
për dhjetë shqiponja mali,
dhjetë tufa trëndeline,
lum Tërbaç, kush ia fali!

Janë vajzat e Tërbaçit,
Si shtojzovalle të këngës,
Kënga, kaluar ilaçit,
Flori shpirti, mjalt i zemrës.

Për këngën - dy labe zonja,
Nuse si lulet në baçe,
Bashkë me tetë shqiponja,
Porsi dhjetë Miro Tërbaçe.

Në këngë porsi thëllëza,
Në valle porsi shqiponja,
Mbushur diell ato rrëza,
Bekim i nënave tona.

Vlorë, e mërkurë, 18. 01. 2017