Qazim Shehu: Blegërimë

QAZIM SHEHU

BLEGËRIMË

Në kohën që blegërin,

Shqetësimi madh të mbetesh pa shqetësim,

Ndjenja ftohet ,brenga ngrin,

Epshet e dhjamosura hidhen delfin,

Fundi i marrëzisë farfurin,

Shqetësimet e  vërteta i zhduk në tym.

Shfryjnë reklamat me xhama zjarri,

Tymi i lavdive gjëmon thellë,

Dhe nga shpërthimi s`shohim asnjë shpellë.

Në damarë na zgjen pendesa,

Për shqetësimet e kësaj bote

Që na fshiu si fshesa,

Harresa, indiferencë mode.

Ç`shqetësim i madh të mbetesh pa shetësim

Ja, një dorë lypsi ngrin,diku bëhet një vrasje

Dhe vjedhja vendin e përfshin,

Të pasurit lumturohen në ngasje.

Atdheu i krehur dhe i dehur,

Dridhet prej mashtrimit,

Në fund të një epoke të vjedhur

Në blegërimë të shqetësimit...

MURET E KOTËSISË

Muret e qelqta të kotësisë,

Na i kris ndonjëherë

Lavdia e gjelave të hajnisë

Tek qeshin si përherë.

Shpejt me pështymë të paaftësisë

I ngjisim këto plasa,

Na duhen muret e kotësisë,

Që as stuhia s`i shemb përjashta…

FJALËT KANË TYM

S`i dihet nga i del tymi fjalës,

Ndizet këtu ,tymin e nxjerr për dhjetë vjet,

Fjala rrugërton si ngjala,

Nga oqeani vjen e vezët lë në kënetë.

Ka fjalë plot zjarr dhe pa tym,

Fjalë që pufkojnë nëpër tym,

Nëpër ftohma mençurie,

Kërcënojnë si kometë pa hije…

FLUTURA

Një flutur e gënjyer në një park të Tiranës

Një ditë e pashë,

Dhe me fëmijërinë time si në një humnerë të ëmbël

Rashë.

Sa kohë u bënë që s`shihja flutura.

Mos për mua kishte ardhur,

Atëhere m`u kujtua e bukura

Në një breg të fshatit si e mardhur.

Bërr… bëra e supi u trondit,

Si nga një gulç i thellë,

Fluturat s`i gjen në këtë hapësirë plot tym,

Dhe mund t`i shohësh edhe në ndonjë shpellë…