Demir Krasniqi: Çka kem pa e përjetue

Demir KRASNIQI :

ÇKA KEM PA E PËRJETUE

-          Këngë rapsodike në të folmen kosovare –

Hej, du   me e nisë ni kangë me e knue ,

Brezav’  t’ ri me ju tregue ,

Nëpër darsma kah kem shkue –

Çka kem pa e përjetue !

Hej, kem knu’  n’ fshatra  e në qytete ,

Kemi pa shpi e adete !

Çka kem hjekë nëpër katune –

Tuj qitë kajde e kanune !...

Hej, në çdo vend si a kanë traditë –

Dalshin njerëzit me na pritë !

Dalshin burrat e konakut –

Me na pritë n’ krye t’ sokakut !

Hej, kjo lloj pritje a  kanë n’ modë ,

Para se të hyjmë në odë ,

Kështu a kanë traditë n’ mes nesh –

Ni prej pritësve na fliste n’ vesh !...

- Hej, mirë se erdhët , o ju  shahira *1) ,

Me na knue kangë të mira !

Kemi miq prej tana anëve ,

Mos gaboni me knue kangë t’ larme *2) !

-Hej , mos na knoni rreth ushkuri *3) ,

Se këtu kemi turli burri !

Për kangë t’ larme iu vjen ranë –

Na vjen puna me iu përzanë !

Hej, pak ma ndej ,  ni  tjetër n’ vesh –

Po u tregoj diçka me besë ,

Çka po knoni , keni kujdes ,

Se këtu kem njerëz t’ UDB-es !

Hej, tjetri dilte afër shpije –

Po u tregoj se këtu kem shkije !

Ngrehnja mirë telat sharkisë –        

Knoni kangë të dygjuhësisë !

Hej, n’ odë të burrave , n’ ato cerga ,

Knon rapsodi  Malush Bega :

“Oj dragane iza brega –

Za tebe me majka ne da !”

Hej, Petllush  Bega , në duet ,

N’ gjuhën shqipe po ia pret :

“More i dashun , në qatë breg –

Për ty , nana nuk po m’ jep !”...

Hej, kështu n’ fillim na kanë hutue –

Nuk kem ditë se çka me knue !

N’ vend të kangëve heroike –

Hej, knojshim përralla e kangë kreshnike !...

*****Sqarim :

*1) Shahira = Në shumë vende të Kosovës quhen këngëtarët , apo rapsodët popullor.

*2) Kangë të larme = Quheshin këngët e dashurisë .

*3) Rreth ushkuri = Po ashtu quheshin këngët e dashurisë me përmbajtje të tepruar erotike .

Gjilan, më 16.05.2014.