Papa i ri është kardinali Bergoglio nga Argjentina

Me gëzim të madh e emocion ju njoftojmë se në ora 19.06 të datë 13 mars 2013 tymi bardhë nga oxhaku mbi kulmin e Kapelës Sikstina kumtoi ngjarjen historike, zgjedhjen e Papës së ri. Turma e besimtarëve shpërtheu në gëzim.

Pra, kardinajtë e Konklavit kanë zgjedhur Papën e ri, pasardhësin e Benediktit XVI. Menjëherë pas daljes së tymit të bardhë nga oxhaku mbi kulmin e Kapelës Sisktina që lartot drejt qiellit për t’i kumtuar Kishës e botës mbarë zgjedhjen e Papës së ri, kambanat e shën Pjetrit ranë solemnisht në shenjë falënderimi ndaj Hyjit që i dhuroi sot Kishës së Tij Bariun e ri.

Kardinajtë vërtet shumë shpjet, vetëm pas pesë votimeve, kanë zgjedhur pasardhësin e 265-të të Shën Pjetrit. E turma e stërmadhe e besimtarëve e shtegtarëve që gjendeshin në Sheshin e Shën Pjetrit në Vatikan e nëpër rrugët e afërta prej disa orëve, shpërtheu në hare e plot brohoritje duke thënë ‘Rrënoftë Papa’, e tani të gjithë me padurim presin kumtimin e Protodiakoni që do të njoftojë zgjedhjen e Papës së ri dhe emrin e tij e pastaj pritet dalja në ballkonin e bazilikës së Shën Pjetrit, nga ku Papa i 266-të i Kishës Katolike, do të drejtojë fjalën e parë e do të japë bekimin e parë Apostolik.

Biografia e Papës së ri, Jorge Mario Bergoglio, Françesku

Jorge Mario Bergoglio, jezuit, kryeipeshkëv i Buenos Airesit, Ordinar për besimtarët e ritit lindor, që banojnë në Argjentinë, lindi pikërisht në Buenos Aires, më 17 dhjetor 1936, nga një familje me origjinë piemonteze. Studioi dhe u diplomua si teknik kimik, por më vonë ndjeu thirrjen e Zotit dhe hyri në seminarin e Villa Devoto. Më 11 mars 1958 kaloi në noviciatin e Shoqërisë së Jezusit, përfundoi studimet humanistike në Kili dhe në vitin 1963, pasi u kthye në Buenos Aires, mori diplomën universitare në filozofi në Fakultetin e Filologjisë të kolegjit “San José” të San Miguel-it.

Ndërmmet viteve 1964 e 1965 ka qenë profesor letërsie dhe psikologjie në kolegjin e Zojës së Papërlyer në Santa Fe. Në vitin 1996 ka dhënë mësim po këto lëndë në Kolegjin e Shëlbuesit në Buenos Aires. Nga viti 1967 deri në vitin 1970 studioi teologji në Fakultetin e Teologjisë të kolegjit “San José”, ku mori edhe diplomën universitare në këtë fushë. Më 13 dhjetor 1969 u shugurua meshtar. Në vitet 1970-71 përfundoi probandatin e tretë në Alcalà de Henares të Spanjës e më 22 prill 1973 mori kushtet përfundimtare.

Ka qenë mësues novicësh në Villa Barilari të San Miguel-it, profesor në Fakultetin e Teologjisë, Këshilltar i Provincës së jezuitëve dhe Rektor i kolegjit. Më 31 korrik 1973 u zgjodh provincial i Argjentinës, detyrë që e ushtroi për gjashtë vjet. Ndërmjet viteve 1980 dhe 1986 ka qenë rektor i kolegjit dhe i Fakultetit të Filozofisë e të Teologjisë dhe famullitar në kishën e Patrikut shën Jozef, në dioqezën e San Miguel-it. Në mars 1986 shkoi në Gjermani për të përfunduar tezën e doktoraturës. Më pas, eprorët e dërguan në kolegjin e Shëlbuesit, nga ku, kaloi në kishën e Shoqërisë së Jezusit në qytetin e Kordovës, ku kreu detyrën e drejtuesit shpirtëror e të rrëfyestarit.

Më 20 maj 1992, i Lumi Gjon Pali II e emëroi ipeshkëv titullar të Aukës dhe ndihmës të Buenos Airesit. Më 27 qershor të po atij viti u shugurua ipeshkëv .