Xhelal Marku: Dita Botërore e Turizmit në Durrës

Dita Botërore e Turizmit në Durrës

Nga Xhelal Marku

Është krijuar një traditë e bukur tashmë, madje në të gjithë vendin tonë, ku 27 shtatori - Dita Botërore e Turizmit, pritet me entusiazëm në mbarë hapsirat turistike shqiptare, si një ditë e shënuar, ku krahas atmosferës festive, marrin jetë e promovohen edhe strategji e projekte te reja zhvillimi, për këtë sektor të rëndësishëm e jetik të ekonomisë së vendit. Dhe, siç është bërë zakon, në këtë ditë feste, institucionet e specializuara, bashkë me partnerët privatë dhe komunitetet, jo vetëm festojnë, por dhe bëjnë bilancet e punës së tyre, ku promovohen arritjet e shënuara gjatë një viti, në zhvillimin e Turizmit Shqiptar dhe përcaktohen detyrat për të ardhmen. Sigurisht në këtë ditë, përzgjidhet edhe vendi, ku Ministria e Turizmit, Kulturës, Rinisë dhe Sporteve, si dhe Agjensia Kombëtare e Turizmit organizojnë veprimtaritë e tyre festive e kulturore. Vitin e kaluar, Festa e Turizmit u bë në një nga qytetet e trashëgimisë më të pasur kulturore e turistike të vendit, në Shkodër, me slloganin: “Turizmi bashkon kulturat”. Ndërsa këtë vit, festa për Ditën Botërore të Turizmit u zhvillua në qytetin bregdetar të Durrësit, i njohur për vlerat turistike e kulturore në vend, i cili gjatë këtij sezoni turistik rezulton të ketë pritur mbi 3,5 milionë turistë, një shifër rekord kjo, në historinë e këtij destinacioni të preferuar të Turizmit Shqiptar. Sllogani i kësaj dite të shënuar ishte: “Turizmi dhe Energjia e Qëndrueshme”, që i perket strategjisë së re të zhvillimit të Turizmit Shqiptar gjatë periudhës njëvjeçare e në vazhdim. Specialistët e imazhit të AKT-së, Andi Nallbani e Ergys Faja,  që ideuan dhe realizuan dekorin festiv të kësaj dite, i gjetëm aty pranë podiumit, ku prisnin ardhjen e grupit të kolegëve të tyre të punës nga Tirana. Atmosfera festive e Ditës së Turizmit, ndjehej kudo, që nga hyrja e qytetit 3000 vjeçar të Durrësit, përgjat rrugëve kryesore e deri në bregdet, ku ishte përzgjedhur dhe vendi për të festuar. Një tribunë e stolisur bukur, si për çdo festë, me ngjyra të shumta, me shpinë nga deti dhe me pamje nga qyteti, ku lexohej dukshëm dhe që nga larg sllogani i kësaj dite, dukej sikur të ftonte natyrshëm në këtë mjedis të preferuar festiv. Banorë të qytetit, nxënës të shkollave, të moshuar e pensionistë, por dhe shumë përfaqësues të mediave, vazhdojnë të mblidhen në sheshin buzë detit, përballë të cilit harkojnë lulishtet, zona muzeale dhe monumentet e kulturës. Edhe moti i nxehtë i këtij fundshtatori të vjeshtës, si në ditët më të mira të gushtit, duket sikur e ka kthyer stinën e Verës tek ne, me katër muaj e ndoshta dhe me pesë muaj plazh. Jemi mësuar të dëgjojmë rekorde të reja vizitorësh, që  Turizmi Shqiptar rregjistron për çdo vit, por me sa duket, tani ai po rregjistron edhe rekorde të reja të muajve të plazhit, ku vera e zgjatur po i merr vjeshtës për çdo vit edhe shumë ditë plazhi për pushuesit. Sipas një shprehje të urtë popullore, kësaj i thonë: “...Kur vjen mbarësia hapi derën, se nuk e ndal asgjë...”. Dhe e mbara në Turizmin Shqiptar, tashmë ka ardhur, madje dhe është ulur këmbëkryq kudo në Trojet shqiptare, në këtë vend të lashtë dhe me të ardhme të madhe turistike.

Dita Botërore e Turizmit, festë e të gjithë shqiptarëve

Kur sheshi po mbushej me manifestues të shumtë dhe syri të rrokte peisazhe plot ngjyra, që gjallëronin nga uniformat festive dhe tollumbacet, që ngjiteshin deri në lartësi, po nga lartësia shfaqet një tjetër atmosferë, ku festarët e hapsirave ajrore, dhanë mesazhet e tyre për këtë ditë të shënuar të Turizmit në të gjithë Globin. Alket Islami, një emër i njohur i fluturimeve të tilla, bashkë me ekipin e tij, ishin ata, që i dhanë Festës përmasa të reja edhe më të mëdha. Pas disa fluturimesh të guximshme rreth e qark qytetit të Durrësit, që nga lartësia e hapsirës ajrore, ku ata fluturonin, lëshuan edhe mesazhet turistike të kësaj dite, duke hedhur mbi audiencën pjesëmarrëse të festës, qindra fletëpalosje me mesazhet thirrje, për mbrojtjen dhe mbajtjen pastër të mjedisit. Në to, lexohej:

“...Shqipëria është një parajsë pushimesh, ndaj punoni për të ardhmen e saj. Ju që e doni detin, mbajeni pastër plazhin! Një pjesë e konsiderueshme e Shqipërisë është natyrë e virgjër, shijojeni atë dhe mos e ndotni! Para se të përdorni ajrin e kondicionuar, hapni dritaret dhe shijoni ajrin e pastër të natyrës! Kur nuk i përdorni paisjet elektrike, si kompjutera, televizorë, etj, lutemi i fikni plotësisht ato! Tek lexon këto fletushka, që përfundojnë në duart e të pranishmëve, duket se me këtë nismë të rëndësishme të slloganit festiv, janë përfshirë e solidarizuar edhe të gjithë banorët e Durrësit, ku në këtë pjesëmarrje spikatën sidomos, nxënësit e shkollave të veshur me uniformat festive të kësaj dite - bluza dhe kapele të bardha, ku lexohej dukshëm sllogani turistik i këtij viti: “Energjia e qëndrueshme vjen duke mbështetur zhvillimin e qëndrueshëm të Turizmit”. Përfaqësues të shumtë të mediave, që ishin të pranishëm në këtë mjedis festiv, nxitonin për të fiksuar në aparaturat e tyre sa më shumë atmosferë të kësaj dite, organizuar përsosmërisht dhe më mirë se çdo herë tjetër nga Drejtoria e Përgjithshme e AKT-së. Ndërkohë, pjesëmarrës të shumtë, kanë zënë vend dhe presin para podiumit për  çeljen e veprimtarive zyrtare kushtuar Ditës Botërore të Turizmit. Në këto çaste, kur ora po afronte dhjetë, në sheshin festiv zbresin edhe Ministri i Turizmit, Kulturës, Rinisë dhe Sporteve, Z. Aldo Bumçi, Kryetari i Bashkisë së Durrësit, Z. Vangjush Dako, përfaqësues të Trupit Diplomatik të akredituar në vendin tonë, të Ministrisë së Mjedisit, të Shoqatave Kombëtare të Turizmit, pushtetarë vendorë të Qarkut të Durrësit, etj., të cilët sipas traditës i pret me bujarinë e saj, “e zonja e shtëpisë”, Drejtoresha e Përgjithshme e Agjensisë Kombëtare të Turizmit, znj. Brikena Arapaj. Një mirëseardhje e shtrëngim duarsh me të ftuarit, një bisedë e shkurtër për këtë ditë feste dhe më pas, ajo u prinë miqëve drejt podiumit, ku ngjiten të gjithë me rradhë, njëri pas tjetrit, duke startuar hapjen zyrtare të veprimtarive festive, kushtuar Ditës Botërore të Turizmit 2012. Në fjalën e saj të hapjes, znj. Brikena Arapaj tha: “...Siç e shihni, kësaj here, për të festuar së bashku, Ditën Botërore të Turizmit, historia e të cilës nisi 32 vjet më parë, ne përzgjodhëm Durrësin, si detinacioni që historikisht ka mbledhur më shumë turistë në vendin tonë. Kjo ditë e shënuar, me veprimtaritë e zhvilluara për nder të saj, ka synuar gjithnjë nxitjen dhe  ndërgjegjësimin e vazhdueshëm të komunitetit, për rëndësinë e Turizmit dhe vlerave të tij sociale, kulturore, politike dhe ekonomike. Ju siguroj se edhe në të ardhmen, AKT-ja do t`u japë rëndësinë e duhur produkteve të turizmit të qëndrueshëm dhe do të mbështesë të gjitha iniciativat, që garantojnë një zhvillim të mëtejshëm të turizmit në Shqipëri...”. Më pas e ka marrë fjalën edhe Ministri i Turizmit, Kulturës, Rinisë dhe Sporteve, Z. Aldo Bumçi, i cili në fjalën e tij përshëndetëse theksoi: “... Dita Botërore e Turizmit, që u festua për herë të parë më 27 shtator të vitit 1980, atëherë kur Organizata Botërore e Turizmit (OBT), e shpalli atë ditë feste, vjen kurdoherë tek ne me një mesazh të madh e përherë aktual, për t`i dhënë industrisë turistike shqiptare dimensionin dhe rëndësinë e duhur në ekonominë kombëtare, si sektori më jetik i ekonomisë, të cilit i përket e ardhmja. Ndonëse Turizmi Shqiptar është një sektor relativisht i ri në vendin tonë, ne jemi krenarë për sfidat dhe progresin, që ai ka shënuar në konkurencën ndërkombëtare të tregut, sidomos gjatë dhjetëvjeçarit të fundit, duke u përfshirë në listën e dhjetë vendeve më të preferuara të Globit, ku Shqipëria rekomandohet si vendi i parë në Botë, që duhet vizituar nga turistët e huaj...”. Në këtë tubim foli edhe Zëvendësministri i Mjedisit Z. Taulant Bino, i cili u ndal në bashkëpunimin e frytshëm, që kanë të dy sektorët: Turizmi dhe Mjedisi, si sektorë të ndërvarur e që plotësojnë njëri tjetrin. “...Pa një mjedis të pastër, nuk mund të kemi turizëm të zhvilluar e konkurues, tha ai. Ndaj, ruajtja dhe mirëmbajtja e mjediseve turistike është dhe mbetet detyrë parësore, e përhershme, por dhe e përbashkët e dikastereve tona edhe në të ardhmen, për të përmbushur objektivat dhe sfidat globale të konkurencës së tregut botëror...”. Më tej, festa e Ditës Botërore të Turizmit në Durrës, ka vazhduar me veprimtari  të shumta kulturore e argëtuese të nxënësve të shkollave të qytetit, vizita në muzetë e në objektet e trashëgimisë kulturore, etj.