Shuhet Arbën Xhaferri

Maqedoni, shuhet Arbën Xhaferri

Kryetari i nderit të Partisë Demokratike Shqiptare dhe intelektuali i njohur shqiptar Arbën Xhaferri, ndërroi jetë të mërkurën pasdite në Klinikën e Shkupit, pas një goditje celebrale që pësoi javën e kaluar në banesën e tij në Tetovë. 
Lajmi u konfirmua nga mjekët në klinikën neurokirurgjike, ku ndodhej i shtruar Xhaferri. Sipas mjekut Vlladimir Mirçevski, Arbën Xhaferri ka pasur trajtim të posaçëm dhe ishin ndërmarrë të gjitha masat, mirëpo tentativat për të shpëtuar rezultuan të kota. 
“Përkundër të gjitha përpjekjeve të ekipit të mjekëve dhe ekipit profesionist, si rezultat i përkeqësimit sekondar të një dite më parë, zoti Arbën Xhaferri ndërroi jetë sot në ora 15:50 minuta”, deklaroi Mjeku Mirçevski. 
Të mërkurën e kaluar Xhaferri u dërgua në Klinikën e Shkupit në gjendje të rëndë kome, pas një problemi në tru që kishte përjetuar. Edhe përkundër ndërhyrjeve mjekësore, gjendja e tij nuk u përmirësua. 
Me rastin e vdekjes së zotit Arbën Xhaferri nesër më 16 Gusht 2012, në ora 12.00, në Pallatin e Kulturës në Tetovë do të mbahet mbledhja komemorative, kurse kortezhi për përcjelljen e të ndjerit do të niset nga qendra e Tetovës në ora 13.30 për në varrezat e qytetit. 
Kryetari i parë i PDSH-së disa vite me radhë ka vuajtur nga sëmundja e Parkinsonit. Nëvitin 2007, për shkak të gjendjes shëndetësore ai u tërhoq nga posti i kreut të PDSH-së, pasi kishte udhëhequr këtë parti për 12 vite me radhë. 
Arbën Xhaferri ka lindur në Tetovë më 24 janar të vitit 1948. Shkollën fillore dhe të mesme e ka kryer në Tetovë, ndërsa studimet filozofike në Beograd. Deri në vitin 1990 ka punuar në Radio Televizionin e Prishtinës si redaktor përgjegjës për programin kulturor. 
Në vitin 1994, në zgjedhjet e dyta parlamentare në Maqedoni për herë të parë u zgjodh deputet në Parlamentin e Maqedonisë. Në cilësinë e kryetarit të PDSH-së, Xhaferri në vitin 2001 ishte mes nënshkruesve të Marrëveshjes së Ohrit. Arbën Xhaferi është çmuar si një nga intelektualët më të mëdhej shqiptarë në trevat shqitpare. 
Nishani: Xhaferri, mjeshtër i dialogut politik

Nga Tirana lidhur me lajmin e hidhur ka reaguar presidenti i Republikës, Bujar Nishani, i cili e vlerëson Xhaferrin si “një udhëheqës vizionar që do të na mungojë të gjithëve”. 
“Arbën Xhaferri vuri në dispozicion idealet për t’i shërbyer shqiptarëve dhe demokracisë”, thotë Nishani në mesazhin e tij të ngushëllimit. 
Kreu i shtetit shqiptar thotë më tej se, Xhaferri përdori me mjeshtëri dialogun për të zgjidhur me qetësi problemet politike të pashpresa.  
Berisha: Humbja e Xhaferrit, pikëllim për shqiptarët
Edhe kryeministri Berisha i ka dërguar një mesazh ngushëllimi familjes së mendimtarit të madh shqiptar, për humbjen e njeriut të tyre të dashur. 
“Ndarja nga jeta e Arbën Xhaferrit solli pikëllim dhe trishtim tek mbarë shqiptarët”, shprehet Berisha në telegramin e tij. 
Kryeministri vlerëson më tej se, me ndarjen nga jeta të Arbën Xhaferrit shqiptarët kanë humbur një prej personaliteteve më të shquara. 
“Kontributi i Arbën Xhaferrit është një trashëgimi tejet e çmuar që meriton mirënjohje”, shprehet shefi i ekzekutivit shqiptar. 
Rama: Humbje e madhe për botën shqiptare
Kryetari i Partisë Socialiste të Shqipërisë, Edi Rama ka shprehur hidhërimin e tij lidhur me vdekjen e Xhaferrit, përmes një mesazhi të publikuar në rrjetin social Twitter. 
Rama është shprehur se, Arbën Xhaferri ishte nje shqiptar jotipik, që tha të vërteta të mëdha e hapi rrugë të pashkelura me trimëri të jashtëzakonshme intelektuale! 
“Vdekja e tij është një humbje e madhe për botën shqiptare në disa përmasa që veç Arbën Xhaferri i mishëronte në një njeri të vetëm. U prehtë në paqe”, thotë Rama. 
Topi: Xhaferri, politikan me profil perëndimor
Ndërsa ish-presidenti Bamir Topi, në mesazhin e tij ka vlerësuar klasin e Arbën Xhaferrit në botën e politikës mbarëshqiptare. 
Sipas Topit, Xhaferri ishte një intelektual me profil perëndimor dhe humbja e tij përbën një humbje kombëtare. 
“Shqiptarët janë të trishtuar për humbjen e qytetarit, filozofit, mendimtarit dhe politikanit Arbën Xhaferri”, shprehet Topi. 
AK: Humbëm një rilindas të madh
Nuk ka munguar ndërkohë edhe ngushëllimi nga ana e Aleancës Kuqezi, e cila i ka shprehur ngushëllimet më të thella familjarëve të Xhaferrit. 
Në telegramin e saj, AK shprehet se shqiptarët humbën të vetme “mendje të kthjellët” që synonte bashkimin e trojeve të tyre. 
“Sot u nda nga jeta dhe nga ne rilindasi i madh. Arbën Xhaferri ishte mendja më e kthjellët e trojeve shqiptare. Lamtumirë Arbën Xhaferri, amaneti i bashkimit të shqiptarëve”, thuhet në telegramin e Aleancës.  
Ngushëllime edhe nga Prishtina
Telegrame ngushëllimi për familjen dhe mbarë popullin shqiptar për vdekjen e publicistit dhe intelektualit të shquar shqiptar Arbën Xhaferri kanë ardhur edhe nga liderët shtetërorë të Kosovës. 
Presidentja e Republikës, Atifete Jahjaga, përmes një telegrami ngushëllimi shkruan se: “Vdekja e Arbën Xhaferrit do të lërë një boshllëk të madh jo vetëm për ju si familjarë dhe për bashkëpunëtorët e tij në subjektin politik që e themeloi dhe me të cilin qëndroi i lidhur gjithë këto vite, por edhe për të gjithë ata që e njohën dhe e vlerësuan qëndrimin e tij politik". 
Kryeministri Hashim Thaçi në ngushëllimin e tij për familjen shkruan se: “Arbën Xhaferri ishte profil i lartë i politikanit, mendimtarit dhe vizionarit që la gjurmë të ndritura dhe kontribut të çmuar në jetën politike jo vetëm në Maqedoni, por edhe në tërë hapësirën shqiptare”. 
Kryetari i Kuvendit, Jakup Krasniqi thekson nga ana tjetër se, “Arbën Xhaferri do të kujtohet për guximin, sakrificën dhe mprehtësinë intelektuale, me të cilën i dha mençuri politikës shqiptare në plan mbarëkombëtar". 
Lideri i Lidhjes Demokratike të Kosovës, Isa Mustafa tha se Arbën Xhaferri do të mbahet mend përherë për veprën e madhe në shërbim të kombit”. 
Mehmeti: Humbëm njeriun që i bëri ballë presioneve maqedonase 
Ndërkohë, shqiptarët e Maqedonisë pritën me hidhërim të thellë lajmin për ndarjen nga jeta të politikanit dhe mendimtarit, Arbën Xhaferri. Për analistin Kim Mehmeti, shqiptarët e Maqedonisë, humbën njeriun që i bëri ballë presioneve të qarqeve intelektuale maqedonase ndaj popullsisë shqiptare. Mehmeti vlerësoi rolin vendimtar të Arbën Xhaferrit në fazën e fundit të konfliktit të 2001-it duke qenë një ndër nismëtarët e Marrëveshjes së Ohrit.
Selia e Partisë Demokratike Shqiptare në Maqedoni, që Arbën Xhaferri kryesoi për 12 vjet, e së fundmi mbante postin e Presidentit të Nderit, është në zi dhe ka nisur përgatitjet për përcjelljen për në banesën e fundit të liderit të saj.
Analisti dhe Drejtori i Zyrës së Top Channel në Shkup, Kim Mehmeti shprehu ngushëllimet dhe dhimbjen për humbjen e madhe, shtoi nevojën që shqiptarët, jo vetëm në Maqedoni, duhet të mësojnë se si të vlerësojnë vlerat e tyre. Dhe Arbën Xhaferri është një vlerë kombëtare, tha zoti Mehmeti, dhe për nderimin e veprës së tij është i nevojshëm një bashkëpunim mes Tiranës, Prishtinës dhe Shkupit.
Varrimi i Arbën Xhaferrit pritet të mbahet ditën e enjte në orën 13:00.
Top Channel shpreh ngushëllimet për ndarjen nga jeta të Arbën Xhaferrit.

_________

Kush ishte Arbën Xhaferri

Kryetari i nderit i Partisë Demokratike Shqiptare, Arbën Xhaferri u lind në Tetovë në vitin 1948. Ai do të mbahet mend si një nga mendimtarët që lexoi drejt kalendarin në të cilën jetonte dhe atë kalendar e shënoi me veprimtarinë dhe mendimin e tij që zbërthente dhe u jepte kahë proçeseve në mbarë shoqërinë shqiptare. 
Pjesën më të madhe të jetës së vet Arbën Xhaferri e kaloi në Prishtinë, atje ku gjetën strehim shumë intelektualë shqiptarë nga Maqedonia gjatë sistemit socialist. 
Xhaferri u kthye në Tetovë në vitet e hutesës së madhe politike që e jetonin shqiptarët nëMaqedoni dhe jo vetëm ata. Pra, ai u kthye në vendlindje në vitet e kundërshtive të mëdha brenda partisë më të madhe shqiptare, Partisë për Prosperitet Demokratik, e që do përfundonin me përçarjen e saj. 
Dhe nga njëri krah i kësaj partie do formohej PDSH-ja e sotme, e cila do drejtohej nga Xhaferri deri në vitin 2007, kohë në të cilën ai ishte kryetar i saj i nderit. 
Me kthimin në Maqedoni, në njëfarë mënyre, shqiptarëve, Xhaferri ua ktheu nderin e munguar të mendimit politik shqiptar. Ndaj edhe shumë shpjet u bë figura më e spikatur  politike, e cila nga dita në ditë do merrte edhe përmasat e mendimtarit mbarëkombëtar. 
Ai ia doli të kontribuojë për faktorizimin politik të shqiptarëve të Maqedonisë, por edhe ta përcaktojë vendin e tyre si faktor i rëndësishëm për mbarë shqiptarinë. 
Duke vepruar në një Maqedoni ku përballë kishte arrogancën e politikës maqedonase, e pas vetes inferioritetin e politikës shqiptare, Xhaferri duhej të ecte drejt së ardhmes si ai që duhet të vinte baraspeshë mes ëndrrave iracionale maqedonase dhe ambicieve shumë tokësore të shqiptarëve. 
Pra, ngaqë duhej të vepronte lokalisht, por duke menduar mbarëkombëtarisht, ai herë herë nuk u kuptua drejt as nga bashkëkombësit e vet në Maqedoni, e aq më pak nga maqedonasit etnike, të cilët në fillimet e veprimtarisë së tij politike, mendimin e tij e përjetonin si fatkeqësi natyrore që i ka ndodhur Maqedonisë. 
Arbën Xhaferri është një nga firmëtarët e Marrëveshjes së Ohrit në vitin 2001, e cila i dha fund konfliktit të armatosur në Maqedoni, por që nuk e zgjidhi problematikën mes shqiptarëve dhe maqedonasve, sic edhe e pranon vetë ai në një intervistë për emisionin “Shqip” në Top Channel. 
“Unë nuk them që ka marrë fund, por them se ajo marrëveshje nuk po implementohet. Në dallim nga të tjerët, unë jam i vetmi që e kam lexuar e stërlexuar Marrëveshjen e Ohrit dhe e di çfarë përmban ajo. Të tjerët nuk e kanë lexuar dhe nuk e dinë se në cilat pika po devijohet kjo marrëveshje”, tha Xhaferri. 
Arbën Xhaferri mbase ishte nga politikanët e rrallë që ia doli nga e përkohshmja, politika, të bëjë shumëçka që atë do e bëjë të përjetshëm në botën shqiptare. 
E ajo që atë do e bëjë të pavdekshëm, mbase nuk janë vendimmarrjet politike, të cilat gjithësesi nuk mungojnë, por mendësia e tij, e një filozofi që gjithmonë shihte më qartë e më larg se thuajse të gjithë politikanët e tjerë shqiptarë. 
Kuptohet edhe si i tillë, largpamës e me mendim të ndritur, ai nuk ka mundur ta parashikojë se do vdiste pasditen e kësaj të mërkure gushti, por gjithësesi se më qartë se cilido tjetër, i shihte rrugët e ardhmërisë ngado shkonte kjo shqiptari e copëtuar, të cilës mbase më së shumti i mungojnë njerëz vizionarë si Arbën Xhaferri.