Sejdi Berisha: Lutje e pakuptimtë...

Sejdi BERISHA:

 

LUTJE E PAKUPTIMTË...

 

1.

Në pranverë

Mos më ngacmoni me lamtumirë

Se vdekjen

Nuk e pranojnë as lulet as behari

Se lëndohen

Gjelbërimi dhe mallëngjimi

 

Sepse

Në pranverë lulet vrapojnë pas meje

Mëkat do të bënit që t’i tradhtonit

 

Sepse

Shumë ëndrra së bashku

Kurorë i kemi thurë

 

Sepse

Histori ka kurora

Keni kujdes mos e lëndoni

Këtë stinë plotë plagë

Me histori e pa histori

Me data e faqe të këputura

Që zemrën e shpirtin ngatërrojnë

 

2.

Në verë

Kurrë mos e shuani zjarrin

Le të merr dallgë

Se në këtë stinë

Këngë të bukura këndohen

E njerëzit digjen me radhë në to

 

Në këtë stinë

Mollë e Kuqe më kërkon

Vetëm ngjyrën për t’ia puthë

Si lulediellin në lindje të diellit

 

Vera

Edhe detin e trazon

Për shkrumbin e njeriut

Për stinët e tretura

Nëpër lotët e shiut

 

3.

Në vjeshtë

Ju lutëm keni kujdes

Mos bëni mëkat

Gjethin e verdhë për t’ma rrëmbyer

 

Sepse

Shumë rrugëtim kemi bërë

Dhe asnjëherë nuk kemi arritur

Njëri-tjetrit t’i rrëfejmë

Për shkrumbin e trungut

Për padrejtësitë e ikjes

Për përcëllimin e vetvetes

Për pritjen kah pritjet

Që janë kohë e drobitur

 

4.

Në dimër

Kurrë mos më ngrohni

Se acari do të hidhërohet

Qiriu i akullt do të çmendet

Pse gjakun e trupit s’ma mërdhinë

E rrugët rrëshqasin

Pakuptim vjedhin

Diçka nga jeta ime

 

5.

Janë këto lutjet e mia

Janë këto kërkesat e mia

Janë këta katër rrathë jete

Janë këto stinë

Që pa mua do ta shkatërronin vitin

 

Sepse

Në mua bora e zë borën

Sepse

Në mua lulet i presin lulet

Sepse

Në mua gjethi e zë gjethin

Sepse

Në mua stina e puthë sitën

Gjithnjë duke ecur

Gjithnjë duke kënduar

Këto janë

Kush i kupton

Lutjet e mia të pakuptimta...