Kulturë
VALENTINA DAFA - POEZI
E enjte, 19.08.2010, 05:38 PM
VALENTINA DAFA
1-REGËTIMAT E DITËS ME SHI
Më lëndon qyteti i mbytur në shi,
me ëndrrat e zgjuara pas xhamash.
Hieroglifet e filxhanëve
transkriptojnë vashat,
bredhin kujtimeve me melodi mallesh.
Djemtë përqeshin vetveten
nën tymin e cigares
Në afshin e gotës dhe vatrës
thashethemisen pleqtë.
Për dreq!
Era e brumit të pjekur
me naze grash,
ngre qejfe pa kohë,
e pa moshë.
Asgjë s`kupton,
si ndodh!
… Më gëzon qyteti i mbytur në shi.
Gjithçka ka kohë për dashuri…
2-KORDINATA FATALE
Koha,
konverton herë pas here gjuhësi orale,
nën delikatesë identitetesh të fshehura,
nën kallëpe plastike manekinësh
që konservojnë rrudhat e përlotura .
Në sipërfaqe, mosha një koordinatë fatale
që duhet harruar.
Vendlindja , po se po,
dhe cepi i provincës që ngriu mbi syrin e fëmijës,
tek zhubraviste një letër karameleje
me dëshirën e një ëndrre të bukur.
… Kohë e “abortuar”, ajo dikur,
fetus që s`u bë kurrë bebe në ndërgjegjet e adoptuara
pas shkëlqimit të rremë …
Po sot?
Sot në udhët e flliqura
Sheh shterzime të gjithfarë subjekti,
Aborte gjuhësh pa identitet,
Njeriun e çalë me incident nga halli,
dhe njeriun mendjeçalë nga hatri për tjetër jetë...
Sot,
bisturia estetike e kohës
dhelpërisht persekuton prenë e vetë…
3-SHPRESA
Shpresa si hijet shumëzohet në udhë,
pastaj,
s`i mbetet as hi.
S`di si ringjallet
me muzikën e agut,
me hapin tim të thirrur nga lulet.
Me petalet e nëntëdhjetë e nëntë fateve të krisura,
zogjtë më thurin kurorë.
Mëkatet e bardha stolisin vetminë,
me buzëqeshjen e shpresës pa stacion,
që për pak më mbështjell në një ciklon.
Dridhshëm më lëshon, si lot…
E s`duhet hi për ringjallje.
Avujt e frymës mjaftojnë për të,
për shpirtin,
kurorën e fatit të fshehur…
…shpresa si hijet shumëzohet në udhë,
Prej lëkurës mbin e ringjallet.
4-NJË LUTJE
Një ditë s`do të të shoh më.
As pragun, as diellin.
Kafet e pira nj? jetë të tërë,
miq e shokë do të pinë në një ditë.
Me dëshpërim.
Po, deri atëherë..
Do t`i gëzohem mrekullisë!
Një lutje...
O zot,
Edhe një ditë...
edhe një ditë...
Amin!
5-TI IKE LARG
Ti ike me dhimbjen tënde
larg, larg viseve tona.
Për ta bërë të huaj vuajtjen ...
Shpirtin lë pas,
shpirtin në duart e mia,
në pragun tënd...
tek përpëlitet prej mungesës
e dyzimit të largësive...
Vuajtja jote vlon gjakut tim
me syrin në cep të udhës...
6-SHOQES SIME NJË MESAZH
Më gjete duke luajtur me hijen time
tek hartografoj jetën-fat
me mijëra kilometra larg teje
me tjetër ngjyrë
…të njëjtën lamë pas
A të kujtohen vitet e qeshjes,
ku stina rridhte aq shpejt,
e digjeshin ëndrrat në diell?
Përcillnim kaq shumë dashuri njerëzore.
Të pafaj!
…Dhe erdhi kjo kohë…
Kjo stinë lubi,
ku eshtrat e qeshjes
varur në muze,
zgërdhijnë përqeshje,
përqeshje…
( p?r ironi:
SA SHUMË MALL!)
Sot,
…më tregon për linjën tënde,
për vajzat që veç njëra të ngjan.
Tjetra babait të saj
Më e vogla kryqëzim i të dyve,
Normal…
Po, me ç`dreq u ngjiz kjo stinë në atdhe
pa dashuri?!
Çuditërisht, ëndrrat i djeg në shi!
…Më gjete tek arnoj jetën time,
e më ktheve me nj? fjalë;
Eh, sa pas!
Stinën e zbrazët ta ushqej me mall…