Poezi nga Janaq Pani

Janaq Pani

MEDITIM NË BRIGJET E ONTARIOS

Me blloqe qikllopësh veshur brigjet

t'i zbrapsin dallgës harbimin

tek nget, përplaset e tërhiqet

e mundur e zbut zemërimin.

Mendova, ja një punë me vlerë

e mendjes që di të ndërtojë përditë,

jo si tek ne që ngritëm bunkerë

e Mur Kinez i bëmë kufitë.

PRAGMUZGU MBI ONTARIO

Një fashë u nder mbi liqen

me xhevaire të hënëzuar

e gjer te bregu pranë më vjen

me një motiv të frymëzuar.

Një çetë zogjsh sillet përreth

të dehur nga kjo dritëargjënde,

e fllad i lehtë ulet mbi gjeth

si partitura e një kënge...